kapazpfc.az saytının “Tam sərbəst” adlı rubrikasının bu dəfə qonağı Əli Səmədovdur. Oxucularımız Səmədovun futboldan kənar həyatı ilə tanış olub, onu yaxından tanıyacaqlar. 

Beləliklə, bizimlə tam sərbəst olan gənc yarımmüdafiəçini dinləyək:

 

Ata ilham mənbəyi rolunda

Həyatda sığındığım, arxalandığım yaxınlarımın arasında atam ilk sıradadır. O, ailəmizin başçısı, bizi həmişə düşənən, qayğımızı çəkəndir. Futbol adamıdır, onu çoxları tanıyır – İlham Səmədov. Uşaq futbolunda çalışır. Onu da deyim ki, atam həm də mənim məsləhətçimdir. Düz yol göstərir, dəyərli məsləhətlər, tövsiyyələr verir. Onun sözlərinə qulaq asmışam və heç vaxt peşman olmamışam. Nə etmişəmsə, ilk növbədə onunla məsləhətləşmişəm. Atamın müsbət rəyi olmadan addım atmamışam. Atam tək mənim yox, futbolçu olmağa çalışan yeniyetmə qardaşımın da yolgöstərənidir. Onunla nəfəs alırıq. Düzdü, atamla mübahisə də edirik. Amma aramızda böyük bir incilik baş verməyib. Əsasən, futbolla bağlı üst-üstə düşməyən fikirlərimiz olur. İnanırsız, biz mübahisələrimizi çox vaxt  gülə-gülə edirik. Çünki hirsli adam deyil. Mənə adətən səliqəsizliyə görə irad tutur. O, geyimdə səliqəyə fikir verəndir, tez-tez də bunu üzümə vurur (gülümsəyir).

 

Maşın şou

Avtomobillərə marağım çoxdur. Həmişə istəmişəm ki, şəxsi avtomobilim olsun. Atam uzun illərdir ki, avtomobil sürür. Gözümüzü açıb onu maşında görmüşük. Həyatı başa düşəndən də özümə maşın almağı arzulamışam. Şükür, istəyim reallaşıb. Artıq üçüncü maşınımı sürürəm. Elə bilməyin ki, bahalı olublar. Xeyr, indi sürdüyüm köhnə BMW-dir. Bundan əvvəlkilər isə Sovet istehsalı olan avtomobillər olub. Sürdüyüm avtomobillərdən tez bezirəm deyə dəyişirəm. Amma deyəsən daha dəyişə bilməyəcəm. Benzinin qiyməti qalxdı (gülür). Əvvəlki avtomobillərim benzinlə işləyirdi, indiki isə dizellə çalışır. Maşınlarımı öz pulumla, futboldan qazancımla almışam. Evdən kömək istəməmişəm. Birincini alanda lotoreya oynayırdım, o birilərini isə demək olar ki, başa-baş dəyişmişəm. Yüksək sürətə meylli adam deyiləm. Amma nədənsə həmişə Gəncə -Bakı yolunda radara düşürəm (gülümsəyir). Sürücülüklə yanaşı, pilot olmağa da meylim olub.  Aviasiya akademiyasına daxil olmaq istəyirdim. Lakin futbola görə Azərbaycan Dövlət Bədən Tərbiyəsi və İdman Akademiyasına işlərimi verdim. Pilot olmağa da həvəsim daha çox səfərlərdə olmağımla bağlıdır.   

 

Zövqlə seç, dəblə geyin

Yaxşı, dəbli geyimlə aram sazdır. Pal-paltarıma fikir verən birisiyəm. Sözün düzü indiki zamanda hamı yaxşı geyinməyi, cazibədar görünməyi arzulayır. Xüsusən də, biz gənclər. Ona görə də geyindiklərimə diqqət verirəm. Xoşuma nə gəlirsə, eyni zamanda cibimə uyğundursa, alıram. Ən çox Türkiyə mallarına maraq göstərirəm. Türkiyənin öncül moda və geyim markalarından sayılan, həmçinin dünyada da tanınan “Koton” və “DeFacto” firmalarına böyük məmnuniyyətlə müraciət edirəm. Çünki bu firmalardan zövqlü paltarları asan tapıram, uzun-uzadı axtarmağa ehtiyac yoxdur. Bəzən elə olur ki, xoşladığım geyimlər başqa firmalardan olur, onu da alıram. İndiki zamanda dükanlar çoxdur. Bəyəndiyim bir şey qabağıma çıxırsa, alıram. Hər maaş vaxtı özüm üçün alış-veriş edirəm. Demirəm ki, aldığım bütün pulu geyimə verirəm. Alış-verişə nə qədər pul xərclədiyimi açıqlamaq istəmirəm, qoy sirr qalsın. Bu vaxta kimi aldığım ən bahalı paltar şalvar olub. Deyim ki, əvvəllər paltarları evdəkilər alırdılar. Uşaq və yeniyetməlik dövrlərini nəzərdə tuturam. Artıq yetkin yaşdayam, heç kimə əziyyət vermirəm. Üç il olar ki, geyimdə qərar özümə məxsusdur. Valideynlərim də bilirlər ki, nə geyinirəm, odur ki, geyimimə qarışmırlar. Ətirləri də sevirəm. Amma bahalılarına pul vermirəm. Bir dənə bahalı almaqdansa, o qiymətə normal üçünü əldə etmək olar.

 

Asudə vaxtın səmərəli təşkili

İndi internet dövrüdür. Hər bir evdə internetə bağlı ən azından bir-iki adam var. O mənada ki, xəbərləri oxuyur, informasiya toplayır və ya sosial şəbəkələrin istifadəçisidir. Gənclər müasir dövrün tələbinə daha çox açıq olurlar. Elə mən də həmçinin. Amma mən asudə vaxtımı yalnız internetlə yox, televiziyaya baxmaqla da keçirirəm. Bədii filmlərə, seriallara çox baxıram. Deməzdim ki, bu məndə asılılıq yaradıb, əsla. Sadəcə, boş olanda televizorun qarşısında əyləşirəm. Əsasən Türkiyə istehsalı olan kinolara və teleseriallara tamaşa edirəm. Seçimim müxtəlif janrlarda olur. İlk sırada romantik və komediya janrlarında çəkilənlər marağımı çəkir. “Rəcəb İvedik” gülməkdən doymadığım filmlərdir. “Medcezer” və “İçerde” kimi hamının baxdığı seriallara baxmışam. Çağatay Ulusoy və Fahriye Evcen ən çox sevdiyim serial qəhrəmanlarıdır. Ayrıca, Cem Yılmazı da fərqləndirərdim. O, tanınmış gülüş üstasıdır. Digər ölkələrin filmlərini də xoşlayıram. Daha çox aksiyon filmlərini maraqla izləyirəm. Yəqin ki, kinoların əksəriyyəti həyatdan götürülür. Bu səbəbdən də baxdıqca nəsə öyrənməyə, götürməyə çalışırsan.  

 

Nizami yurdu Gəncə

Gəncə Azərbaycanın ikinci böyük şəhəridir. Böyük tarixi olan, dahi şəxsiyyətlər yetişdirmiş məkandır. Elə bütün dünyada tanınan böyük mütəfəkkir Nizami Gəncəvinin adını çəkmək bəs edər. Ulu şeyxin adını deyəndə yada ilk Gəncə düşür. Mən bu şəhərdə anadan olmuşam, Nizami yurdu ilə fəxr edirəm. Bura mənim üçün əziz, doğma yerdir. Başqa yerə gedəndə şəhərimiz, evimiz üçün darıxıram. Mümkün qədər tez dönməyə çalışıram. 12 yaşında “Qəbələ”nin akademiyasına qəbul olunanda çox ağlayırdım, evə qayıtmaq istəyirdim. Çünki evsiz qala bilmirdim. Amma böyüdükcə öyrəşməyə başladım. Hər həftə evə gəlirdim, ara günləri isə atam yanıma gəlirdi. İndi də təhsil və ya futbolla bağlı Bakıda olanda ürəyimiz Gəncədə olur. Şəhərimizdə tıxac problemi yoxdu (gülür), havası, suyu təmizdir. İnsanları qonaqpərvərdir, daha nə tərif deyim? Gözəl, füsünkar təbiətə malik Göygölümüz, Hacıkəndimiz var. Ürəyimiz istəyəndə oralara gedib istirahət edirik. 

 

Xeyir işi gecikdirmə

Tez evlənən və tezdən duran uduzmaz deyə bir məsəl var. Bununla razıyam. Amma mənim üçün hələ tezdir. Cəmi 20 yaşım var. Düzdü, atam tez ailə qurub, onu cavan baba edə bilərəm (gülür). Lakin dediyim kimi hər şeyin öz vaxtı var. Mənim üçün indi evlənmək qarşıdakı beşilliyin planlarına daxil deyil. Şükür, evim, avtomobilim, işim var. Fikrim daha yaxşı şərait qurmağa, əsas da uğurlu karyera çızmağa yönəlib. Futbol oynamaq mənim üçün ilk sıradadır. Hələ istədiyim yerə çatmamışam. 25 yaşında evlənmək olar. Desəm ki, sevməmişəm, oxucular səmimi olduğuma inanmazlar. Yaşımız elədir ki, sevgini gizlədə bilmərik. Təzəliklə bir iş vardı, fikrimdə tam ciddi idim. Evdə də bilirdilər. Amma alınmadı. Futbolçuya niyə qız verməsinlər ki? Qismət, deməli, belə məsləhətimiş. Nişanlansam belə toy uzanacaqdı. İllərlə nişanlı qalmaq olar, amma sevgili yox. 

 

 

Son oyun

18/11/2017 - 15:00

Kəpəz
2:3

Səbail
Gəncə şəhər stadionu

Növbəti oyun

25/11/2017 - 14:30

Kəpəz
-:-

Qəbələ
Gəncə şəhər stadionu