Tural Rzayev: “Bu qələbə “Kəpəz”ə təkan olacaq” 


“Kəpəz” çempionatın ilk dövrəsinin yekunlarına əsasən, 8-ci pillədə yer alıb. Komanda geridə qalan 7 oyundan sonra turnir cədvəlinin sonuncusudur.

Gəncə klubu 1 matçda heç-heçə etməklə 5 görüşdə uduzub və cəmi 1 dəfə qələbə qazanıb.

 

Əvvəlki iki mövsümlə müqayisədə Nizami yurdunun təmsilçisi üçün Premyer Liqanın startı uğursuz alınsa da, son turda “sarı-göylər” möhtəşəm qələbə ilə hamıya ümid verib. Elə “Kəpəz”in üzvü Tural Rzayev də bu fikirdədir: “Çempionata çox yaxşı hazırlaşmışdıq. Bizim üçün ölkə xaricində təlim-məşq toplanışı təşkil olunmuşdu. Amma Premyer Liqaya istədiyimiz kimi başlaya bilmədik. Ardıcıl oyunlarda uduzduq. Bunun da səbəbkarı biz futbolçularıq. Çünki komandaya yaradılan şəraitin fonunda inamı doğrulda bilmədik. Sadəcə, oyunumuz biz istədiyimiz kimi alınmadı. Bununla belə sonuncu turda “Qəbələ” səfərində qazandığımız qələbə bizim üçün əla oldu. Əhval-ruhiyyəmiz düzəldi, bir az özümüzə gəldik, komandaya münasibət dəyişdi. Göstərdik ki, istənilən rəqiblə oynaya bilərik, yalnız gücümüzü toplamalıyıq. Bu qələbə “Kəpəz”ə təkan olacaq. Fasilədən sonra daha yaxşı oynaya biləcəyik”.

 

Cari mövsümdə daha çox oynamaq şans əldə edən Tural Rzayev start heyətinin daimi üzvünə çevirilib. Hücumçu son 4 matçda ilk “11-lik”də yer alıb: “Həmişə öz üzərimdə çalışıram. Məqsədim bütün oyunlarda əsas heyətdə yer almaqdır. Yerimi möhkəmləndirmək istəyirəm. Çox şükür olsun ki, bu mövsüm əlimə düşən fürsəti dəyərləndirə bilmişəm. Mənə şans verdiyi üçün baş məşqçimizə də minnətdaram. Ümidləri doğrultmalıyam. Sözün açığı, hələlik öz oyunumdan tam razı deyiləm. Çatışmazlıqlarım çoxdur. Bunun üzərində məşqlərdə işləyirəm. Nəyə qadir olduğumu meydanda göstərə bilməmişəm”.

 

Gəncə şəhər stadionunun əsas meydançası bir müddətdir ki, yeniləndiyindən “Kəpəz” doğma publika önündə çıxış edə bilmir. Meydança amilinə görə komanda ilk dövrədə bütün görüşlərini Nizami yurdundan kənarda oynamağa məcbur olub. Rzayevin fikrincə, komanda Gəncəyə dönəndə daha uğurlu qrafik çızmağa başlayacaq: “Azarkeşlər, Gəncə üçün çox darıxmışıq. Fanatlar bizim ən güclü tərəflərimizdən biridir. Onlar “Kəpəz”in üstünlüyüdür. Gəncədən xal aparmaq bütün klublar üçün çox çətindir. Çempionatın liderləri burada büdrəyir. Odur ki, evdə oynayacağımız günü səbrsizliklə gözləyirik. Azarkeşlərin də dəstəyi ilə Gəncədə daha yaxşı mübariz aparıb, xallar qazanacağıq”.

 

Gəncə futbol məktəbinin yetirməsi olan Tural Rzayev üçüncü mövsümdür ki, “Kəpəz”in uğur qazanması üçün çalışır. 24 yaşlı futbolçu titullar qazanıb adını doğma klubunun şərəf lövhəsinə yazdırmaq fikrindədir.

 

 


05.10.2017 12:18

Axırıncı xəbərlər →

Son oyun

14/10/2017 - 16:00

Zirə
3:0

Kəpəz
Zirə İdman Kompleksinin stadionu

Növbəti oyun

21/10/2017 (All day)

Kəpəz
-:-

Neftçi
.